Украински и американски преговарачи имаа состанок во Флорида. Разговори се закажани и за денес, со цел да се најде излез од руско – украинската војна.
„Продолживме да разговараме за клучните прашања и следните чекори во процесот на преговори.Особено внимание беше посветено на конвергенцијата на пристапите за понатамошен напредок кон постигнување практични резултати“, изјави за Икс главниот украински преговарач Рустем Умеров.
Руските и украинските преговарачи се состанаа двапати оваа година на разговори спонзорирани од САД во Обединетите Арапски Емирати и одржаа уште една рунда разговори во Женева во февруари. Москва и Киев се согласија за размена на затвореници, но не беше постигнат никаков друг напредок.
Белата куќа го нарече последниот состанок „конструктивен“, при што дискусиите „се фокусираа на стеснување и решавање на преостанатите прашања со цел приближување кон сеопфатен мировен договор“.
Умеров и украинскиот претседател Володимир Зеленски рекоа дека нови разговори ќе се одржат денес.
Американскиот преговарачки тим го предводат Стив Виткоф, специјалниот претставник на американскиот претседател Доналд Трамп, и неговиот зет Џаред Кушнер.
Коментирајќи ги дискусиите, Виткоф за Икс изјави дека американската страна ја поздравува „континуираната посветеност на решавање на отворените прашања, признавањето на важноста на пошироката глобална стабилност“.
Тој, исто така, му се заблагодари на Трамп „за неговото континуирано водство во унапредувањето на напорите“. Од своја страна, Умеров им се заблагодари на САД за „доследната работа“ насочена кон унапредување на разговорите.
Во својата вообичаена вечерна видео порака, Зеленски рече дека продолжувањето на преговорите е клучно за постигнување договор.
