Редовната физичка активност, надополнета со балансирана исхрана, е клучот за одржување на здравјето и добрата форма во сите животни периоди. Комбинацијата од протеини и јаглехидрати му обезбедува на телото енергија за време на вежбањето и помага во постигнување подобри резултати. Но, дилемата што често се поставува е – дали е подобро да се јаде пред или по тренинг?
Стручњаците предупредуваат дека ниту вежбањето на празен стомак, ниту тренингот веднаш по обилен оброк не се идеални опции. Недостигот од храна може да предизвика замор и слабост, додека прејадувањето носи ризик од тежина во желудникот и мачнина.
Оптимално е да се внесе лесен оброк во период од 30 минути до два часа пред физичката активност, во зависност од индивидуалните потреби. Нутриционистката Bonnie Taub-Dix посочува дека секој организам реагира различно – некои луѓе не можат да јадат пред тренинг, додека други се чувствуваат исцрпено ако не внесат барем мала ужина.
Препораката е оброкот да содржи лесно сварливи намирници со добра рамнотежа меѓу протеини и јаглехидрати. Како практични опции се издвојуваат:
- банана,
- смути со зеленчук и извор на протеини,
- грчки јогурт со јаткасти плодови,
- интегрален тост со сирење.
Нутриционистката Frances Largeman-Roth советува оброк околу еден час пред тренинг, додека Тауб-Дикс препорачува временска рамка од 30 минути до два часа. Доколку немате многу време, и мала ужина од 200 до 250 калории може да биде доволна за да обезбеди енергија без да го оптовари желудникот. Хидратацијата, секако, е задолжителна.
По завршување на тренингот, телото влегува во фаза на обновување. Во тој период протеините се неопходни за регенерација на мускулите, а јаглехидратите за надоместување на потрошените резерви на гликоген. Ларџмен-Рот препорачува оброк 15 до 20 минути по активноста, кој ќе содржи комбинација од јаглехидрати, протеини, здрави масти и антиоксиданси.
Меѓу препорачаните избори по тренинг се:
- јогурт со јаткасти плодови и свежо овошје,
- интегрален мафин со авокадо,
- овесна каша со младо сирење, јаткасти плодови и овошје.
Заклучокот на експертите е дека најважно е да се следат сигналите на сопственото тело. Добро испланираната ужина пред и по тренинг може значително да го подобри ефектот од физичката активност и да помогне во побрзо закрепнување и подобра енергија во текот на денот.
