Рускиот министер за надворешни работи Сергеј Лавров изјави во вторник дека нема причина за ентузијазам околу притисокот на американскиот претседател Доналд Трамп врз Европа и Украина, нагласувајќи дека мирот во Украина е сè уште далеку. Неговите коментари дојдоа само неколку дена по разговорите во Абу Даби кои САД, Украина и Русија ги опишаа како тешки, но конструктивни, но сугерираа дека постигнувањето конечен договор би можело да биде многу тешко, објавија РИА и Ројтерс.
Русија продолжува да инсистира на своите почетни, максималистички барања. Тие вклучуваат територијални претензии кон источните региони на Украина и спротивставување на каква било можност Украина да се приклучи на НАТО или да биде домаќин на западни сили на нејзина територија како дел од безбедносните гаранции.
Украинскиот претседател Володимир Зеленски во своето вечерно обраќање рече дека „сигурните безбедносни гаранции се единствената вистинска основа за мир“. Тој, исто така, предупреди дека Русија би можела да го тестира секое мирно решение со напади или „некаков вид хибридни операции“.
Во меѓувреме, Кремљ објави дека датумот за следната рунда разговори сè уште не е одреден, но инсистира дека тие веројатно ќе се одржат наскоро. Во исто време, Русија продолжува да ја напаѓа енергетската инфраструктура на Украина. Преку ноќ беше погодена енергетска централа во јужниот црноморски регион Одеса, и тоа во време кога земјата сè уште се справува со ниски температури.
