Врз одлуката да се суспендира вишиот обвинител Мустафа Хајрулахи не влијаело тоа што периодов имаат заострени односи, вели републичкиот обвинител Љупчо Коцевски, кој ги отфрли обвинувањата дека со суспензијата на Хајрулахи прави преседан, го крши законот за јавни обвинители и ја злоупотребува хиерархиската моќ, пренесува „Телма
Овие критики кон Коцевски во понеделникот ги упати членката на Советот на јавни обвинители, Кети Петкова, која единствено беше против суспензијата, но денеска таа не беше присутна на седницата и не се сретнаа со Коцевски. Тој вели дека постапил законски и го суспендирал Хајрулахи поради истрага за две сериозни кривични дела.
Петкова, пред да стане дел од советот, била адвокатка во предметот на СЈО – „Поштенска банка“, еден од предметите што се под лупа, затоа што вишото обвинителство ја повлекло жалбата и предметот запрел. Таа тврдеше дека тоа не влијаело врз нејзините ставови. Хајрулахи, пак, го спореше тоа што што обвинителката Лиле Стефанова од поранешното СЈО е дел од тимот што врши контрола во вишото. Коцевски вели дека во надзорот нема предмети на кои постапувала Стефанова претходно и дека нема судир на интереси.
