Коалицијата „Влен“ денеска обвини дека младите кои го запалија државното знаме на Денот на албанското знаме се блиски соработници на поранешниот вицепремиер Артан Груби.
Арбен Фетаи, секретар за надворешни работи од Алијанса за Албанците и актуелен заменик-претседател на Владата, истакна дека е задоволен што планот за дестабилизација на ДУИ, кој бил наметнат на Денот на независноста на Албанија, беше спречен, а 17 лица беа приведени.
„Никој не смее да запали државно или национално знаме, без разлика на припадноста. Ние брзо и професионално го решивме ова. Со жалење ви известувам дека имаме докази и фотографии кои покажуваат дека младите кои го запалија знамето се блиски соработници на Артан Груби, кој е познат како „мајстор на казиното“, изјави Фетаи.
Тој апелираше за намалување на политичките тензија и забрана на говорот на омраза, како начин да се обезбеди мир и напредок во државата.
„Повикувам на намалување на тензиите и забрана на говорот на омраза, бидејќи тоа претставува пречки за мир и напредок. Ние како ВЛЕН ќе продолжиме да бидеме гаранти на стабилноста и развојот на нашата држава. Секој Албанец има право да живее и да слави без страв од политички поделби или манипулации кои можат да го нарушат мирот и хармонијата што сакаме да ги изградиме за сите“, додаде Фетаи.
