Млад човек роден во Лондон, кој е познат како „Божјиот инфлуенсер“, официјално ќе стане светец во Католичката црква. Карло Акутис, кој почина од леукемија во 2006 година на 15-годишна возраст, ќе биде прогласен за светец во април, откако папата Франциск му припиша второ чудо.
Канонизацијата на Карло има посебно значење бидејќи тој станува првиот светец од генерацијата милениумци, што може да има силно влијание врз помладите генерации верници.
Карло е роден во Велика Британија, но пораснал во Италија и бил познат по создавањето веб-страници за неговата парохија и училиште. Тој привлече најголемо внимание за страницата каде што документираше чуда, која беше лансирана непосредно пред неговата смрт, а подоцна преведена на неколку јазици.
Процесот на канонизација бара две признати чуда, а Карло веќе беше прогласен за блажен во 2020 година благодарение на чудото за исцелување на бразилско дете. Уште едно чудо што му се припишува се случило во 2024 година кога студент од Фиренца бил излечен од мозочно крварење по траума на главата.
Папата Франциск најави дека Карло ќе биде прогласен за светец за време на викендот кој започнува на 26 април. Оваа вест одекна меѓу верниците ширум светот, особено меѓу младите кои беа инспирирани од неговата работа, пишува Би-Би-Си.
