Основното јавно обвинителство за гонење организиран криминал и корупција поднесе обвинение против пет лица за трговија со дете. Меѓу нив се и таткото и љубовникот на малолетничката.
Со истрагата е утврдено дека во периодот од 22.9.2017 година до 27.2.2018 година, кога мајката на детето била задржана во притвор, првообвинетиот како нејзин татко се обврзал да се грижи за својата тогаш петнаесетгодишна ќерка. Злоупотребувајќи ја својата положба како родител старател, во два наврата на девојчето му договорил присилен брак.
Од декември 2017 година девојчето било екплоатирано преку проституција од страна на второ, трето и четвртообвинетите, кои договарале сексуални услуги од детето за одреден паричен надоместок во Тетово и Скопје. На 27.2.2018 година детето било пронајдено од полициски службеници, без родител како законски застапник, пријавено во Центарот за социјални работи – Скопје и згрижено во „Мал групен дом“ во Скопје.
Кон крајот на 2018 година детето самоволно го напуштило домот каде што било згрижено. Во периодот од 24.12.2018 година до 13.1.2019 година трето и четвртообвинетите го прифатиле, засолниле и заедно со петообвинетата во одделни случаи го подведувале на вршење полови дејства со други лица за одреден паричен надоместок. Исплатените пари за услугите што ги давало девојчето ги зеле осомничените, а за возврат му обезбедувале престојувалиште.
Сите осомничени се во притвор.
