Комисијата за следење на обврските на земјите членки на Советот на Европа при Парламентарното Собрание на Советот на Европа (ПССЕ) во извештајот за кој се дебатира денеска на пленарната сесија, ги препознава проблемите со кои се соочува полското судство и судиите, особено во однос на ефикасноста на спроведувањето на правдата, јави дописникот на МИА од Стразбур.
Во извештајот се поздравува приоритетот на полските власти за отстранување на недостатоците на полскиот судски систем. Во исто време, се потенцира дека е од суштинско значење спроведените реформи целосно да се усогласат со европските стандарди и ефикасно да се зајакне независноста на судиите и владеењето на правото. Известувачите Ројхан Густафсон Азадех (Шведска) и Омциг Петер (Холандија) ја поздравуваат секоја реформа на автономните судски структури што има за цел да ја зајакне нивната транспарентност и нивната одговорност, истовремено со зачувување на нивната независност и автономија. Сепак, тие сметаат дека е неприфатливо овие реформи да го стават судскиот систем на Полска под контрола на извршната или законодавната власт, или уште полошо, под политичка контрола на владејачкото мнозинство.
Во извештајот длабоко се жали што многу аспекти на реформата на полското правосудство и судството се спротивни на европските стандарди. Нивниот кумулативен ефект ја поткопува и сериозно ја оштетува независноста на судството и владеењето на правото во Полска. Тие исто така го изложија судството на политичко мешање и обиди да се добие политичка контрола врз извршната власт, што ги доведува во прашање самите принципи на демократска држава управувана од владеењето на правото. Затоа, се повикуваат полските власти да ја разгледаат целокупноста на мерките за реформа на судството и да ги изменат релевантните законодавства и практики, согласно препораките на Советот на Европа.
Известувачите остануваат загрижени за уставната криза предизвикана од составот на Уставниот суд, која се уште останува нерешена. Враќањето на законитоста на составот на Судот, согласно европските стандарди, е неопходно и треба да биде приоритет. Целосното и безусловно извршување на одлуките на Уставниот суд, вклучително и неговиот состав, треба да биде камен темелник за решавање на кризата, смета ПССЕ.
Во извештајот се осудува прекумерната употреба на дисциплински постапки против судиите и обвинителите во Полска, што има негативно влијание врз судството и ја загрозува неговата независност. Во овој поглед, комитетот повикува на отворање независна јавна расправа за политички мотивираната кампања за непочитување, наводно, организирана против членовите на судството од страна и со помош на високи функционери од Министерството за правда и Националниот совет за правосудство.
Извештајот нагласува дека ПССЕ е загрижено за почитување на владеењето на правото од страна на Полска што директно ја засега цела Европа и не може да се смета за внатрешно прашање на Полска. Затоа, се препорачува сите земји членки на Советот на Европа да обезбедат судовите, кои се во нивна надлежност, да ги верификуваат сите релевантни случаи со кои треба да се справат во кривична и граѓанска постапка дали постапка за фер судење во смисла на член 6 од Европската конвенција за човекови права може да им се гарантира на обвинетите во Полска.
Гласањето на предложената резолуција е предвидено по денешната расправа на пленарната сесија.
