Тутунска банка доби над два милиони евра од осигурителна компанија за ланскиот грабеж
Тутунска банка успеала да поврати 80 проценти од трите милиони евра кои и беа украдени во грабежот кој се случи минатата година, а го изврши вработен во банката, заедно со уште неколкумина.
Во декември минатата година банката склучила спогодба со осигурителна компанија за надомест на 80 проценти од штетата.
-Другиот дел од штетата во износ од над 35 милиони денари банката го евидентираше како трошок во билансот на успехот заклучно со 31.12.2017 година на позицијата останати расходи од дејноста, соопштија од банката.
Грабежот беше извршен лани во април, а кон крајот на годината беше донесена и првостепената пресуда за обвинетите. Девет години и два месеци затвор е казната која ја доби Бобан Смилевски, а неговиот брат Горан Смилевски, кој како и Бобан се товареше за тешка кражба и затајување, е осуден на шест години и шест месеци. Борис Мичевски кој според обвинителниот акт наводно ги превезол украдените пари, доби казна од пет години и два месеци.
Пресудата денеска беше соопштена во Кривичниот суд, а според неа четвртообвинетиот во овој случај, Мирослав Каевски, вработен како трезорист во Тутунска банка, доби условна казна затвор од две години.
Судијата Дарко Тодоровски образложи дека пресудата ја донел врз основа на признанието на обвинетите, а висината на казните ја образложи со фактот дека обвинетите не откриле каде се украдените пари.
Со пресудата тројцата првообвинети се задолжени и во рок од една година на правосилноста на пресудата солидарно да ја надоместот штетата на Тутунска банка. До правосилност на пресудата обвинетите остануваат во притвор бидејќи судијата Тодоровски ги одби барањата на адвокатите обвинетите да се бранат од слобода или да бидат во куќен притвор.
Основното јавно обвинителство Скопје во јули поднесе обвинение против осум лица за грабежот на НЛБ Тутунска банка, а подоцна постапката беше издвоена за четворица. Според обвинителниот акт, од банката биле украдени околу 3 милиони евра.
