Бејли: Постои реална можност Македонија набргу да стане членка на НАТО

Амбасадорот на САД во Македонија, Џес Бејли, денеска по повод Денот на НАТО учествуваше на трибина со наслов „НАТО и ти“ во организација на Mинистерството за одбрана.

Во рамките на трибината Бејли посочи дека таа се разликува од претходните дискусии зашто сега може да се каже дека постои реална можност Македонија набргу да стане членка на НАТО и рече дека се цени учеството на Македонија во мисиите на алијансата.

Покрај амбасадорот на САД, на трибината „НАТО и ти“ учествуваа министерката за одбрана, Радмила Шекеринска, министерот за финансии, Драган Тевдовски, хрватската амбасадорка Даниела Баришиќ, и шефот на Канцеларијата за врски на НАТО, капетанот Горазд Бартол. Тие дискутираа за тоа што претставува НАТО, зошто Македонија сака да биде дел од неа и кои се придобивките од членството за државата и за македонските граѓани.

Инаку, трибината беше отворена со воведни обраќања од националниот координатор за НАТО, Стево Пендаровски, претседателот на светската организација АТА, Фабрицио Лучиоли, и претседателот на „АТА Македонија“ и советник за НАТО на премиерот, Исмет Рамадани.