Search

(Фото) Парада на гордоста во Скопје

Под мотото „Спектакуларно непослушни“ стотици граѓани денеска маршираа низ улиците на Скопје на петтата парада на гордоста, во организација на Националната мрежа против хомофобија и трансфобија.

Маршот започна од паркот „Жена-борец“ во 19 часот со говор на една мајка на трансродова личност. 

„Овде сме за да покажеме дека нема послушно да се повлечеме во четири ѕида и по петти пат храбро покажуваме дека припаѓаме во овој свет и по петти пат ги славиме нашите животи кои се вредни да ги живееме. Во целата еуфорија, од чувството да се биде слободен и автентичен во јавноста не можам а да не помислам на луѓето од нашата заедница кои не смееат да излезат и не можат да бидат тука за да бидат слободни. Додека се радувам кога ја гледам ќерка ми како го вее знамето на заедницата не можам а да не се сетам на сите тинејџери кои живеат во страв од своите родители или се соочуваат со отфрлање“, изјави мајката.

Со музика, знамиња и транспаренти  маршот продолжи кон „Рекорд“, па низ улиците на централното градско подрачје, и заврши кај Стадионот на АРМ, каде е најавена културно-забавна програма.

Учесниците на годинешниот марш велат дека се многу среќни бидејќи се чувствуваат слободни и сакани.

„Оваа ми е петта парада по ред. На овој ден се чувствувам потполно слободно, се чувствувам сакано и прифатено од луѓето што доаѓаат на парадата. Важно е да сум овде бидејќи сум трансродова личност и сметам дека е многу важно сите да се појават на оваа парада“, изјави  Лила Милиќ активистка за правата на трансродовите лица за Радио МОФ.

Треба да знаете
Последни објави