Пропуштена е значајна можност да се преземе акција што можела да го спречи смртоносниот самоубиствен бомбашки напад на крајот од концертот на поп пејачката Аријана Гранде во англискиот град Манчестер во 2017 година, заклучи истрагата.
Дваесет и две лица, меѓу кои и едно осумгодишно дете загинаа, а повеќе од 200 беа повредени кога маж активираше рачно изработена бомба во Манчестер Арената додека родителите почнаа да пристигнуваат да ги земат своите деца по настапот на американската пејачка.
„Имаше значајна пропуштена можност да се преземе акција што можеше да го спречи нападот“, рече директорот на истрагата Џон Сондерс во својот трет и последен извештај за бомбашкиот напад, најсмртоносниот во Британија од самоубиствените бомбашки напади во 2005 година во јавниот транспорт во Лондон.
Претходните извештаи укажуваа дека имало сериозни недостатоци и грешки во обезбедувањето на салата. Едно лице веројатно би преживеало доколку одговорот на итната помош не бил погрешен, се наведува во заклучокот.
Бомбашкиот напад го изврши 22-годишниот Салман Абеди. Неговиот помлад брат Хашем беше осуден на 55 години затвор во 2020 година за охрабрување и помагање во злосторството.
Третиот, постариот брат Исмаил, во јули беше осуден во отсуство бидејќи не сведочеше и не учествуваше во истрагата, туку побегна од Британија.
Браќата Абеди се деца на либиски родители кои емигрирале во Британија за време на владеењето на Моамер Гадафи.
