Поранешниот американски претседател Доналд Трамп изнесе салва од напади врз претседателот Џо Бајден, остро осудувајќи го неговото обраќање за состојбата на нацијата.
Додека салата во Претставничкиот дом полека се празнеше, тимот на Трамп објави на Твитер претходно снимено видео од неговиот „одговор“ за состојбата на нацијата.
Трамп го обвини Бајден дека „не доведе до работ на Третата светска војна“ поради неговото справување со руско-украинската војна и дека неговиот наследник е „најкорумпираниот претседател во американската историја“.
Во „огненото“ двеминутно видео, Трамп ги опиша САД како земја под опсада од имигранти на нејзината јужна граница, нарушена со политичка корупција од администрацијата на Бајден и измачена од инфлација.
Трамп ги обвини Бајден и „радикалните демократи“ за неуспех во имиграцијата и криминалот и го осуди начинот на кој претседателот се справува со трансродовите прашања.
-Неговата администрација води војна против слободата на говорот. Тие се обидуваат да ги индоктринираат и осакатуваат нашите деца. Тој не води на работ на Трета светска војна. И згора на сето тоа, тој е најкорумпираниот претседател во американската историја, рече Трамп.
Трамп кажа и дека милиони имигранти без документи „се прелеале преку нашата јужна граница“ и дека нарко картелите „сега заработуваат милијарди долари со шверц на отров за да ги убијат нашите луѓе и нашите деца“.
-Дивјачки убијци, силувачи и насилни криминалци се ослободуваат од затвор за да го продолжат својот бран од криминал, рече Трамп.
