Search

Шпанскиот премиер бара продолжување на вонредната состојба до 21 јуни

Премиерот на Шпанија, Педро Санчез, изјави дека на неговата земја ѝ се потребни дополнителни 15 дена вонредна состојба, што би траело до 21 јуни, за дефинитивно да се стави крај на здравствената криза предизвикана од пандемијата на коронавирус.

Според тоа, Санчез оваа недела ќе побара од парламентот ново, шесто продолжување на вонредната состојба, ограничувајќи го движењето и собирањето на 47 милиони жители.

„Многу напредувавме“, рече премиерот на прес-конференцијата во Мадрид.

„Но, ќе ни треба уште едно, последно продолжување на вонредната состојба, за да го завршиме она што го започнавме“, додаде тој.

Владата има намера да ги релаксира мерките воведени на 14 март преку четири фази (од 0 до 3).

Денес 70 проценти од населението влезе во фаза 2, во која нема утврден дневен распоред за одење на слободна прошетка, дозволено е да се соберат до 15 лица и на сите трговски центри, без оглед на големината, им е дозволено да ги отворат своите врати.

Најголемите градови Мадрид и Барселона, кои се најпогодени од вирусот, останаа во фаза 1.

По 21 јуни, жителите на Шпанија би можеле слободно да се движат во рамките на секоја од 17-те автономни провинции, а од 1 јули ќе им биде дозволено да патуваат низ целата земја. Тогаш Шпанија има намера да ги отвори своите граници за странските туристи.

Треба да знаете
Последни објави