Читајте деклараци на сите млечни производи. Може да ви се случи наместо од свежо млеко, јогуртот кој го пиете да е произведен од млеко во прав. „24 инфо“ дознава дека Правилникот за млеко дозволува „евапорираното“ млеко како што стручно се нарекува, да се искористи за производство на јогурт и кисело млеко, но млекарницата мора да го декларира истото. Ако, пак, се прогласи состојба на недостиг на млеко, тогаш може да се искористи и за производство на трајно млеко.
Валентина Ангеловска
Евапорираното и млекото во прав наголемо влегуваат во државава. Надлежните го контролираат и велат дека интензитетот е различен во зависност од годишното време. Млекарниците не негираат дека увезуваат, но децидни се дека го користат само за производство на сирење и кашкавал. Но не е секогаш така. Македонскиот правилник дозволува ова млеко да се искористи и за производство на јогурт, кисело млеко, но и павлаки и овошни јогурти. Доволно е само со ситни букви да е напишано дека е произведено од евапорирано млеко. Во Агенцијата за храна велат дека доколку се случи некоја млекарница интензивно да увезува ваков тип на млеко контролите кај неа се многу чести.
Млеко без вода
Увозот на така наречено густо млеко не е ништо ново. Европа на ваков начин го чисти вишокот свое производство, а оние држави кои немаат доволно млеко увезуваат. Директорот за Агенцијата за храна, Зоран Атанасов вели дека ова млеко се користи само за производство на т.н. тврда програма.
– Млекарниците увезуваат „евапорирано“ млеко, но истото не смеат да го користат за производство на трајно млеко. Ако го има во кисело млеко или јогурт тогаш производителот е должен тоа д аго декларира, а потрошувачот да реши дали ќе го купи. Млеко не смее да се произведува- вели Атанасов. Вакво млеко може да се искористи за производство на трајно млеко само во еден случај, да се прогласи од страна на државата официјално дека нема домашно млеко. Но тоа до сега кај нас не се случило.
Млекарниците во земјава работат согласно добиеното одобрение од Агенцијата за храна и ветеринарство, без оглед на тоа дали станува збор за преработувачи на млеко или за млекарници кои произведуваат таканаречени композитни производи. Млечни производи, вклучително и сирење и кашкавал, се исклучиво производи добиени со преработка на сурово млеко. Доколку со технолошкиот процес на производство се дефинирани други состојки, тогаш, тој производ е надвор од дефиницијата за сирење. Согласно законските и подзаконските акти кои ја регулираат оваа материја, производителот не смее производот да го декларира како млечен, ако истиот не е направен исклучиво од сурово млеко- велат во Агенцијата за храна.
Стоп за фалсификувани производи
„Стоп за фалсификуваните млечни производи кои во себе имаат се освен млеко“. Со овој слоган Здружението на млекопреработувачи на Бугарија на Европската унија и предлага закон, со кој ќе се спречи производство и продажба на фалсификувани растителни производи кои се продаваат како млечни. Нивниот предлог се должи на фактот што во цела Европа се произведуваат двојно повеќе млечни производи отколку што е производството на млеко и увозот на истото заедно. Единствено објаснување за бугарските експерти е дека се додаваат протеини и растителни масти, најмногу палмино во скоро секој производ кој се декларира како млечен. Дел од нивните млекарници веќе имаат забрана во нивното производство да користат растителни масти. Статистиката вели дека само една третина од млечните производи кои се продаваат во Бугарија се направени од млеко. Во останатите има палмина маст, млеко во прав или само млечни протеини. Фалсификати се прават и во цела Европска унија.
„Трансглутаминаза“ нова состојка за зреење
Производството на млечни производи со немлечни масти за кратко ќе излезе од мода- тврдат бугарските медиуми. Сега во мода е е новата “технологија” за производство на килограм сирење од само 3 литри млеко со користење на ензимот трансглутаминаза.
– Засега нема како да докажеме кои производители го практикуваат овој метод, бидејќи истражувањето е многу скапо- коментира д-р Сергеј Иванов, управител на Центарот за биологија на храната. Сомнежи сепак постојат кај барем 10 марки сирење дека се направени со помош на ензимот. Тоа е некој вид на лепак за протеини и со него сирењето многу брзо зрее за разлика од класичното.
– За оваа состојка многу малку се знае. Ниту е експлицитно дозволена ниту е експлицитно забранета за употреба во храна. На неа не е направена сеопфатна научна процена какво е нејзиното влијание за здравјето на луѓето- вели Иванов. Ензимот е откриен во Јапонија во 1959 година. Позната е најмногу како лепак за месо. Со нејзина помош од различни парчиња можат да се направат хомогени маси за шунка. Во производството на храна, сепак се користи релативно неодамна. Причината е неговата висока цена, кога се добива од биолошки ткива. Пазарниот пробив е направен во 1989 година, кога една јапонска открива бактериски вид на нишкасти бактерии од групата на актиномицети кои може да произведува во големи количини и на неспоредливо пониска цена трансглутаминаза.
