Македонија нуди одлични услови за инвестирање, пример за тоа се технолошките индустриски развојни зони. Ги повикувам сите компании што сакаат да инвестираат во странство, да ја разгледаат оваа опција, рече во своето обраќање министерот без ресор задолжен за странски инвестиции Елвин Хасан, на 22. Евроазиски економски самит, што се одржува во Истанбул.
Тој истакна дека интеграциите во ЕУ и НАТО се од големо значење за нашата земја, кои со себе носат нови предизвици и можности за инвестирање во Република Македонија.
– Ние како Влада ќе ја искористиме оваа прилика и ќе се залагаме за привлекување нови инвеститори кои ќе помогнат во намалување на стапката на невработеност, која во последните години е значителен проблем особено за младите граѓани на нашата земја, посочи министерот задолжен за странски инвестиции, Хасан.
Евроазискиот економски самит го организира Мармара фондацијата, група за економски и општествени истражувања која има за цел унапредување на односите меѓу ЕУ и земјите од централна Азија и Блискиот Исток.
Говорниците на самитот посебно се осврнаа на соработката помеѓу државите, особено во областа на економијата и енергетика.
