Целосното укинување на квотите за лекови на рецепт почнува на 1 октомври, најави министрот за здравство, Венко Филипче, кој потсети дека во август се укинаа квотите за лекови на рецепт во аптеките во регионите на Охрид, Струга, Ресен, Дојран и во Гевгелија.
Како што рече тој, со ова решение се надминува проблемот со недостиг на лекови и тие стануваат подостапни за пациентите.
Министерот наведе неколку придобивки за кои вели дека ќе бидат обезбедени за граѓаните преку оваа мерка во здравството.
„Пациентите ќе имаат редовен пристап до лекови на рецепт во текот на целиот месец, односно нема да има големи метежи за подигање лекови на рецепт, особено на почетокот на месецот. Исто така, граѓаните ќе немаат страв дека може да останат без потребниот лек за терапија доколку нема квоти во аптеките при крајот на месецот“, нагласува Филипче.
Според оваа одредба, осигурените лица од 1 октомври ќе може да ги подигаат лековите во аптека со рецепт и документ за лична идентификација (лична карта или пасош).
На рецептот го има името и презимето и единствениот матичен број на осигуреникот кому му е препишан лекот. Доколку осигуреникот не може сам да си го подигне лекот, тогаш го зема друго лице во негово име, чиј број на личната карта се запишува на рецептот. На овој начин, нагласуваат од Министерството, точно ќе може да се провери во секое време дали лековите ги добиваат лицата на кои им се препишани.
