Американскиот претседател Доналд Трамп за време на говорот во Конгресот за состојбата на нацијата, најави дека вториот нуклеарен самит со севернокорејскиот лидер Ким Џонг Ун ќе се одржи на 27 – 28 февруари.
Тој истовремено себеси си даде признание за спречување на големата војна на Корејскиот полуостров.
Во обраќањето до нацијата, кое траеше 82 минути, Трамп нагласи дека има уште многу работи што треба да се направат за да се сочува мирот со Северна Кореја, но дека застојот во нуклеарните тестирања е доказ за напредок.
“Заедно можеме да го прекинеме деценискиот политички ќор-сокак. Можеме да ги премостиме старите поделби, да ги излекуваме раните, да изградиме нови коалиции” порача претседателот на САД.
Тој уште еднаш порача дека ќе изгради ѕид на границата со Мексико. Повика на политичка обединетост, нагласувајќи дека смешните партиски истраги ќе му наштетат на просперитетот во земјата.
