Американскиот претседател Доналд Трамп изјави денеска дека САД се обидуваат да најдат решение со Турција по нападот во северна Сирија, но доколку разговорите не успеат, санкциите против Анкара ќе бидат погубни.
– Ние сме во одлична позиција. Се надевам дека потпретседателот Мајк Пенс и државниот секретар Мајк Помпео ќе имаат успешни состаноци во Анкара. Доколку тоа не биде случај, санкциите, царините и другите работи што ги правиме и што ќе ги направиме кон Турција ќе бидат погубни за нејзината економија, рече Трамп на заедничката прес-конференција со италијанскиот претседател Серџо Матарела во Вашингтон.
Трамп во последните денови беше критикуван за неговата одлука да ги повлече американските сили од североисточна Сирија, по што започна турската офанзива.
