Министерот за култура Хусни Исмаили денеска во својот кабинет оствари средба со амбасадорот на Руската Федерација во нашата земја, Сергеј Баздникин.
На средбата, министерот Исмаили и амбасадорот Баздникин ја подвлекоа досегашната одлична соработка во делот на културата меѓу двете земји, која досега резултираше со реализација на повеќе квалитетни содржини со кои македонските културни вредности се претставуваат пред руската публика, како и со реципрочни настапи на руски уметници пред македонската публика. Беше истакната и традиционалната соработка во сферата на литературата и издавачката дејност, како и соработката во театарската дејност. Во тој контекст, министерот Исмаили информираше дека до крајот на годинава е предвидена и реализација на манифестацијата „Денови на македонската култура во Руската Федерација“, додека, пак, Олга Панкина во Москва ќе го реализира проектот „Читај ја Македонија“.
Министерот Исмаили се заблагодари за поддршката во делот на културата што ја дава Амбасадата на Руската Федерација и изрази уверување дека македонско-руското партнерство и понатаму ќе продолжи да се развива и да се унапредува.
Инаку, освен на билатерален план, Република Северна Македонија и Руската Федерација имаат одлична соработка и на мултилатерален план – во рамките на УНЕСКО, како и во рамките на Меѓународната фондација „Форум на словенските култури“, преку која се реализираат многу заеднички проекти и активности со кои се зачувуваат културните традиции на словенските народи и нивното промовирање како трајни и универзални вредности во глобални рамки.
