Search

Спасовски – Петровиќ: Со пријателска Црна Гора чекориме по патот како сојузници во НАТО и идни членки на ЕУ

Премиерот Оливер Спасовски, придружуван од заменик-министерот за политички систем и односи меѓу заедниците Неџад Мехмедовиќ, денеска се сретна со претставници на Здружението на Црногорците во нашата земја, предводени од претседателот Борис Попивода, како и амбасадорката на Црна Гора Марија Петровиќ.

Спасовски, како што информираат од владината прес-служба, на претставниците на Црна Гора им го честиташе Денот на државноста, 13-ти Јули, со желби за продолжување на пријателските односи, како и продолжување и зајакнување на билатералната и економската соработка.

На средбата, Спасовски ја оцени како позитивна заложбата и соработката на Здружението на Црногорците во насока на унапредување на односите меѓу Северна Македонија и Црна Гора, и упати честитки до амбасадорката Петровиќ, за нејзината успешна работа и особен придонес во подобрувањето на билатералната соработка во сите области од взаемен интерес.

– Црна Гора е една од најблиските, најпријателските и најбратските партнери на Северна Македонија и така и ќе остане понатаму. Благодарам за вашата поддршка на нашиот пат, кој го одиме заеднички, патот кон остварување на нашите евроатлантски интеграции, како членки на НАТО и идни членки на Европската Унија, истакна премиерот Спасовски.

На средбата, се вели во соопштението, било разговарано и за неопходните мерки кои се преземаат за успешно справување со корона-кризата, при што е потенцирано дека изборите на 15 јули, идната недела ќе бидат успешно, демократски спроведени, како што доликуваат на земја-членка на НАТО и на земја на европската демократија, која ја чекори последната фаза до полноправното членство во ЕУ.

Попивода, во име на Здружението на Црногорците во нашата земја, на премиерот Спасовски му подари пригоден подарок поздравувајќи го придонесот кон создавање услови за учество на Заедницата во граѓанскиот концепт на државата, во кој и тие како заедница сесрдно учествуваат и го поддржуваат.

Треба да знаете
Последни објави