Search

Се отвора патот за нова дозвола за излез од затвор на Куфодинас

Кривичниот оддел на Врховниот суд на Грција го прифати предлогот на обвинителката Ксени Димитриу за отфрлање на одлуката на Судот во градот Волос, со која беше одбиено барањето на еден од лидерите на терористичката организација „17 Ноември”, Димитрис Куфодинас да добие неколкудневна дозвола за излез од затвор, јави дописничката на МИА од Атина.

Со ова, се отвора патот за дозвола на Куфодинас и неговото барање одново ќе биде разгледано од надлежниот Суд во грчкиот град, каде што тој ја отслужува затворската казна.

Според грчките медиуми, Врховниот суд оценил дека и оние кои што се осудени на повеќе од една доживотна затворска казна имаат право да добиваат редовни дозволи за излез од затвор.

Куфодинас, кој е осуден на 11 доживотни затворски казни за убиства, на 2 мај започна штрајк со глад, откако не беа задоволени неговите барања за добивање седма неколкудневна дозвола за излез од затвор. Неколку дена подоцна, од здравствени причини тој беше пренесен в болница во грчкиот град Волос, каде што ја отслужува затворската казна, а сега е на одделот за интензивна нега поради влошеното здравје.

Анархистички групи и организации, меѓу кои и „Рубикон”, во изминатиот период извршија низа напади на партиски штабови, продавници, на резиденцијата на амбасадорот на САД во Атина, но и на грчкиот Парламент во знак на поддршка и солидарност со „мозокот” на „17 Ноември”.

Според грчките медиуми, од 2 мај, денот кога Куфодинас започна штрајк со глад, до завчера, биле регистрирани 71 инцидент во Атина и 30 во останатите грчки градови, а за половина од нападите има преземање на одговорност.

За дозволата за неколкудневен излез на Куфодинас од затвор, членовите на „Рубикон” го нападнаа со бои и пиротехнички материјали грчкиот Парламент, а еден нивни член беше уапсен.

Треба да знаете
Последни објави