Search

Седница на Владата: Моделот за образовниот процес 2020/2021 , зголемен процентот на исполнетост на возилата за превоз на патници, НАТО вежба на Криволак…

Владата на денешната 80-та седница разгледа и усвои информација со план за одржување на наставата во училиштата во учебната 2020/2021 година на Министерството за образование и наука, и донесе заклучок таа да биде споделена со Комисијата за заразни болести, по што врз основа на мислењето на Комисијата ќе биде донесена одлука за моделот за организирање и спроведување на наставниот процес во основните и средните училишта.

Како што соопшти владината прес-служба, на предлог на Комисијата за заразни болести, Владата ги прифати измените во протоколите за вршење меѓуградски и меѓународен превоз на патници, со што наместо исполнетост до 50 отсто, отсега во меѓуградскиот и меѓународниот патнички превоз е дозволено исполнетост најмногу до 75 отсто од вкупниот капацитет на возилата.

На предлог на Министерството за надворешни работи денеска е разгледана и усвоена информацијата за промена на статусот на Мисијата на Република Северна Македонија при НАТО во Постојана делегација на Република Северна Македонија при НАТО во Брисел.

На оваа седница на министрите им беше презентирана информацијата на Работната група за справување со последиците од т.н. „Проект Скопје 2014″, која ја претстави координаторот на Работната група и советник за урбанизам и градежништво на претседателот на Владата, проф. д-р Мирослав Грчев.

Владата ја разгледа и прифати информацијата и врз основа на неа донесе одлука за влегување и престој на странски вооружени сили на територијата на државава заради изведување на вежбовна активност. Одлуката се однесува на одобрување на влез и престој на 170 припадници на Вооружените сили на Соединетите Американски Држави и 10 припадници на Вооружените сили на Република Полска од составот на КФОР, со возила, вооружување, материјално-технички средства и опрема, заради изведување на вежбовна активност-реализација на гаѓања и заедничка обука со припадниците на Армијата на Република Северна Македонија, кое ќе се изврши на Армискиот полигон Криволак, во периодот од 19 август 2020 година до 25 септември 2020 година.

На предлог на Министерството за одбрана, Владата денеска донесе и одлука за испраќање на 15 припадници на Армијата на Република Северна Македонија за учество на вежбата „COMBINED RESOLVE XIV ” во Сојузна Република Германија, во периодот од 1 до 29 септември, како и одлука за испраќање 15 припадници на Армијата на Република Северна Македонија за учество на вежбата „CARPATHIAN EAGLE” во Република Романија, во периодот од 14 до 27 септември.

На оваа седница Владата ја разгледа и прифати информацијата за начинот на користење на здравствени услуги и за надоместок на трошоците за користење на здравствени услуги во Воено медицинскиот центар и во здравствените установи во државава, на припадниците на Командата на Бригадата на Југоисточна Европа – СЕЕБРИГ (SOUTH EAST EUROPE BRIGADE – SEEBRIG) и донесе одлука за начинот на користење на здравствени услуги и за надоместок на трошоците за користење на здравствени услуги во Воено медицинскиот центар и во здравствените установи во државава, на припадниците на Командата на Бригадата на Југоисточна Европа – СЕЕБРИГ, стои во соопштението од владината прес-служба.

Треба да знаете
Последни објави