Иако ја отвори првата точка, за Законот за Јавно обвинителство, собранискиот спикер, Талат Џафери 135. седница на Собранието ја презакажа за утре во 11 часот, откако за дискусија по точката се пријавија повеќе од 30 пратеници.
Седницата почна со еден час задоцнување, а пратеникот Никола Мицевски, координаторот на опозоциската ВМРО-ДПМНЕ се побуни дека надвор од секоја логика е седницата за започне во 22 часот, а пратениците цел ден да чекаат во Собранието.
-Цен ден не започнува седницата за да се уценуваат пратеници. Ова што го правите сега и изминативе три години, граѓаните го гледааат и на 12 април ќе бидете казнети за сите овие непринципиелни работи. Дали оваа седница треба да почне во 22 часот, кога цел ден сме овде во Собранието? Да се малтретираат пратниците цел ден, за седницата да почне во 22 часот е надвор од секоја логика, рече Мицевски.
На ова спикерот Џафери му одговори дека Собранието не работи во логика, туку по Устав.
За збор се јави и координаторот на пратеничката група на СДСМ, Јован Митревски кој ги „искара“ колегите од ВМРО-ДПМНЕ дека не биле принципиелни и одолговлекувале до одлуката дали ќе учествуваат во работата на Собранието.
Во однос на пораките кои некои од пратениците му ги праќале преку фејсбук, Џафери рече дека тој нема таков профил, и им порача дека ако преку такви пораки повикуваат дека имало можност да се создаде ново мнозинство, ги повика утре на лидерска средба.
-Се додека примам пораки дека има можност да се создаде друго мнозинство дека ќе биде поуспешно, јавно ги повикувам партиските лидери доколку сериозно мислат дека имаат потреба да создадат друго мнозинство, јавно ќе организирам преку мојата покана во текот на утрешниот ден да имаме лидерска средба согласно Пржинскиоит договор, согласно договорот за предвремените избори од 12 април, да потврдиме дека има желба да се одржат изборите на 12 април, истакна Џафери.
Двата закона вчера поминаа во Комисијата за европски прашања и во матичната Законодавно-правна комисија.
Двотретинско мнозинство е потребно за законот за ЈО, кој не е официјален услов за добивање датум за почеток на преговори со ЕУ, но сепак од високите европски претставници се споменува како позитивен сигнал кој би можел да го придвижи процесот.
