По кратко боледување на 48 годишна возраст почина џез музичарот, трубач и професор по труба Александар Николовски.
Веста за неговата смрт ја соопштија од ДМБУЦ Илија Николовски Луј, каде што предаваше долги години.
-Пред еден месец наполни 48 години. Во екот на најубавите години со сила и окураженост и добра мисла за он напред, со надеж дека ќе биде подобро, тој денес си замина, по кратко боледување. Александар работеше како наставник по труба со голема љубов и посветеност кон инструментот и
учениците, да ги насочи и запознае со музиката. Беше тивок и свој, без многу муабети, ишаретите ни ги кажуваше преку очите или гримаса и сè беше јасно“, стои во соопштението.
Од Александар преку социјалните мрежи се простуваат неговите колеги музичари.
Николовски свиреше со голем број џез и латино бендови. Настапуваше на голем број музички џез фестивали со разни музичари и музички формации. Тој потекнува од музичко семејство, чии родители Благоја и Марија Николовски беа познати и признати македонски музички уметници, а неговата сестра Сузана долгогодишен музички соработник во програмите и емисиите на МРТВ.
