Полицијата во Папуа Нова Гвинеја трага по речиси 300 автомобили кои им биле позајмени на официјалните лица за време на минатогодишниот самит на Организацијата на Азиско-пацифичката економска соработка (АПЕК), објави Би-би-си.
Луксузната флота била увезена, за лидерите кои биле во Папуа Нова Гвинеја да можат да се движат во стил во земја што е заглавена во сиромаштија. Од полицијата соопштиле дека 284 возила сè уште недостасуваат. Меѓу нив има модели на „Форд“, „Мазда“ , „Ленд крузер“ и „Мицубиши“.
За среќа, како што наведуваат медиумите, најскапите автомобили „Масерати“ биле лоцирани.
„Сите 40 ‘масерати’ и трите ‘бентлија’ се во добра состојба“, соопштил командирот на полицијата Денис Коркоран.
Лидерите на земјите од јужно-пацифичкиот регион се надеваа дека глобалната конференција ќе привлече инвестиции како и меѓународно внимание кон Папуа Нова Гвинеја.
Но, домаќинот на настанот ги оптовари ресурсите на земјата и побара помош од други земји. Австралија, САД и Нов Зеланд испратија полициски сили за да осигураат дека присутните на самитот ќе бидат безбедни.
Во тоа време, и медиумите и активистите се прашуваа дали има смисла за сиромашните земји да бидат домаќини на меѓународен настан како што е самитот на АПЕК. Критичарите ги видоа стотиците службени автомобили како симболи на владиното трошење односно расфрлање со пари.
