Државните интереси опозицијата ги користи во партиски цели, оцени пратеничката на СДСМ, Славјанка Петровска во гостувањето во „Само вистина“. Таа кажа дека ВМРО-ДПМНЕ секогаш кога е во опозиција и се одржуваат избори, прашањето за името го користи во политичката кампања.
-Тоа го прават затоа што немаат што друго да понудат, ниту програма… Станува збор за нереформирана партија. Се сеќавам дека ова непроменето ВМРО-ДПМНЕ ветуваше еден период дека ќе го смени знамето, па единаесет години беа на власт и тоа не го направија. Сега истото го зборуваат и за Преспанскиот договор, вели Петровска.
Според пратеничката, тоа што ВМРО-ДПМНЕ немала став околу Преспанскиот договор за време на референдумот, само покажува дека партијата нема државотворен капацитет.
-Отворањето на таквите прашања не и носат добро на држава. Еве, последно слушнав дека претседавачот од Советот на Град Скопје од ВМРО-ДПМНЕ кажа дека советниците ќе ги потпишат изјавите со новото уставно име. Со Договорот не ни се наштети нам како државата, ние го задржавме правото да сме Македонци кои зборуваат македонски јазик. Договорот не може да биде доведен во прашање, кажа Петровска.
