Многу соучесници во терористичките напади извршени во Русија се кријат во европските земји и Русија продолжува да врши притисок за нивна екстрадиција, изјави портпаролот на рускиот претседател Дмитриј Песков, пренесува ТАСС.
„Тешко е бидејќи многу соучесници во терористичките напади и убиства за време на крвавите настани на Кавказот се уште се кријат. Многу од нив се во европските земји. Тие добиваат дозвола за престој или државјанство и се слободни. Многу од нив се под истрага за да се побара нивна екстрадиција во Русија. По правило, таквите списоци не се објавуваат “, рече Песков.
Песков информираше дека Русија повеќе пати барала екстрадиција на грузискиот државјанин кој беше убиен во Берлин минатиот август и дека рускиот претседател Владимир Путин бил брифиран за тоа. Според портпаролот на Кремљ, тој човек не бил само осомничен.
„Собрани се убедливи докази за неговото учество во крвавите терористички напади и во масовните убиства“, изјави тој.
Вината на грузискиот граѓанин за сторените кривични дела била утврдена одамна. Песков ги опиша дејствата на Русија преземени за екстрадиција на вакви криминалци како апсолутно нормална практика.
