Search

Ослободени четворица обвинети за „Змиско око“, за останатите условни затворски казни

Основниот кривичен суд Скопје денеска ја објави пресудата за предметот во јавноста познат како „Змиско око“ против вкупно 53 обвинети, вработени на патарините кои беа обвинети за кражба со издвање на фалсификувани сметки пред 13 години.

Претходно два пати Апелацискиот суд ги укинуваше пресудите и го враќаше на повторно судење. Третиот пат судот ослободи четворица од обвининие, а останатите добија условни казни.

„При одлучувањето,  судот ги изведе доказите кои се содржани во напатствијата од одлуката на Апелацискиот суд Скопје, ги имаше предвид својствата на обвинетите, односно улогата која ја имале во предметниот период , а при анализа на доказите и при одлучувањето судот се раководоше исклучиво од материјалните докази кои укажуваа на кои наплатни станици е констатирана некаква штета, а на која наплатна станица не е утврдена никаква штета при работењето на инкасантите“, се наведува во соопштението од судот.

Со пресудата, како што стои во соопштението, Обвинението за кривичното дело Злосторничко здружување по чл. 394 ст.2 од КЗ се одбива поради настапување на апсолутна застареност.

„Обвинетите В.М. С.А., В.Ј., З.Б. се ослободуваат од обвинение за кривичното дело Злоупотреба на службена положба и овластување по чл.353 ст.5 вв ст.1 од КЗ. Останатите обвинети се огласуваат за виновни за кривичното дело по чл. 353 ст.5 вв ст.1 од КЗ па имајќи ја предвид нивната позиција, својство и овластување им се изрекува: За одговорното лице – алтернативна мерка Условна осуда со казна затвор од 2 години која нема да се реализира доколку во следните 5 години не стори ново кривично дело“, се додава во соопштението.

 

Од судот посочуваат дека на обвинетите кои имале својство на контролори на наплатни станици им се изрекува алтернативна мерка Условна осуда со казна затвор од 1 година и 6 месеци доколку во следните 3 години не сторат ново кривично дело, обвинетите со својство на сменоводители и инкасанти им се изрекува алтернативна мерка Условна осуда со казна од 1 година доколку во следните 2 години не сторат ново кривично дело.

Воедно судот не го прифатил предлогот на застапникот на обвинението со дополнителна пресуда да одлучува по однос на имотно – правното побарување и за тоа Државниот правобранител го упатил на граѓанска парница.

„Потребно е да се напомене дека при објавата на пресудата еден од обвинетите чии идентитет е познат искажа навреди и пцовки упатени кон судечкиот совет за што судот ќе изготви службена белешка и ќе покрене соодветна постапка“, се наведува во соопштението од Основниот кривичен суд Скопје. 

 

Треба да знаете
Последни објави