Музичката индустрија во Соединетите Држави ја прекина работата на еден ден, реагирајќи на смртта на невооружениот Афроамериканец Џорџ Флојд, на кого полицаец во Минеаполис му го притискал вратот со коленото за време на апсењето и притоа му го одзел животот.
Сите три главни американски издавачки куќи објавија на социјалните медиуми дека ќе престанат да работат еден ден и повторно ќе се поврзат со својата заедница, пишува Би-би-си. Вработените денес се слободни, а вторник е прогласен за ден на акција, чија цел е да ги охрабри луѓето да преземат одговорност и да се променат.
Interscope вети дека нема да објави нова музика оваа недела, додека Ебро Дарден од Apple Music ги откажа своите радиоемисии. Голем број познати sвезди се изјаснија по повод смртта на Флојд. Ријана (32) на Инстаграм ги сподели чувствата на гнев и тага низ кои минува последниве денови.
„Тешко ми е кога гледам дека моите луѓе ги убиваат и јавно ги егзекутираат од ден во ден“, напиша пејачката.
Бијонсе (38) објави видео на Инстаграм и ги замоли нејзините фанови да потпишат петиција во која се бара правда за Флојд.
„Сите бевме сведоци на неговото убиство среде денот. Ние сме скршени и ужаснати“, напиша таа.
Лејди Гага (34) на „Твитер“ изјави дека гласот на црнечката заедница веќе долго време е замолчен и дека смртта на Џорџ Флојд е резултат на системски расизам и корумпиран систем.
