Женскиот фудбалски тим на најтрофејниот италијански клуб Јувентус го одигра првиот натпревар на стадионот Алијанц, каде машкиот сениорски состав на торинскиот клуб ги игра своите натпревари. Публиката знаеше како да ги награди девојките, па го наполни стадиониот до последното седиште.
Фудбалерките на Јувентус имаа ден за паметење – не само што го добија натпреварот против Фиорентина со 1:0, туку и поставија нов рекорд за посетеност во италијанскиот женски фудбал.
Картите за натпреварот беа бесплатни, само требаше да се резервираат, но интересот и посетеноста ги изненадија дури и најголемите оптимисти. Досегашниот рекорд беше 14.000 посетители на стадион, а девојките на Јувентус успеаја да привлечат 39.000 гледачи и да го наполнат стадионот Алијанц. На стадионот во Торино беа присутни и 121 навивачи на Фиорентина.
Европскиот рекорд за најголема посетеност на натпревар во женски фудбал го држат Атлетико Мадрид и Барселона, а го поставија минатиот викенд во главниот град на Шпанија. Натпреварот кој заврши со победа на Барселона од 2:0 го гледаа 60.739 навивачи.
