Албанскиот претседател Илир Мета во интервју за „АЛБ УК ТВ” изјави дека посакува почетокот на преговорите за членство во Европската унија на Албанија да биде заедно со Македонија.
– Во текот на оваа година многу посакувам да почнат преговорите за членство во Европската унија. Тоа би било позитивно постигнување за Албанија и тоа да можеме да го постигнеме заедно со нашиот сосед, Македонија, која постигна голем успех со решавањето на прашањето за името со Грција, со што сега е подготвена да стане членка на НАТО, изјави Мета.
Второ, посочува тој, многу би сакал да има успешна финализација на дијалогот меѓу Косово и Србија, бидејќи тоа ќе биде од клучно значење за зајакнување на мирот, стабилноста и соживотот во регионот, но исто така и да се гарантира европската перспектива на двете земји и на Србија и на Косово, во исто време.
Во истото интервју Мета оценува дека „ промената на границите не е решеније за регионот”.
– Балканот може да напредува единствено преку соживот во хармонија и зошто не во една блиска иднина границите помеѓу државите да бидат минато со влегување во Европската унија. Тоа е филозофијата околу границите изградена од ЕУ, соработка, соживот за да се гарантира безбеден и здрав амбиент за сите, независно од националноста, верската или друга припадност. Верувам дека за Балканот ова било и е многу значајно, смета Мета.
Додава дека на Балканот секоја нација е мнозинство во една држава, но е малцинство во една или неколку други држави. И единственото решение е сите држави да ги почитуваат европските стандардите за правата на малцинствата.
