Американскиот дипломат и поранешен амбасадор на САД во Скопје, Кристофер Хил е номиниран за нов амбасадор на САД во Србија, соопштено е на веб – страницата на Белата куќа.
Хил е дипломат од кариера. Бил амбасадор во Ирак, Кореја, Полска и Македонија, помошник државен секретар за Источна Азија и Пацификот и шеф на американската делегација на севернокорејските преговори. Зборува српски, полски, македонски и француски.
Како што јави дописникот на МИА од Белград, тој и е познат на српската јавност како специјален пратеник на САД за Косово во дипломатските обиди што завршија со преговорите во Рамбује.
Хил е професор на Одделот за меѓународни и јавни работи на Универзитетот Колумбија.
Новиот американски амбасадор во Србија е запознаен со регионалните прашања, бидејќи тој беше заменик на Ричард Холбрук, главниот американски преговарач за време на мировните преговори во Дејтон, со што заврши војната во Босна и Херцеговина.
Одлуката за номинацијата ја донесе американскиот претседател Џозеф Бајден, а Хил ќе го замени амбасадорот Ентони Годфри, кој е на функцијата во Србија две години.
