Скопјанецот Б.С.(29), син на починатата жена од Ковид -19 кој насилно сакал да го земе нејзиното тело вчера од ГОБ „8 Септември“ е пренесен во државен карантин, кој треба да си го плати на свој трошок бидејќи е позитивен на Ковид-19. Против него ќе биде поднесена кривична пријава за непостапување по здравствените прописи.
Починатата пациентка пет дена била на респиратор во ГОБ „8 Септември”. Согласно протоколите починатите пациенти од КОВИД-19 ги подигнува специјална екипа од погребалното претпријатие Бутел опремена со скафандери и друга специјална опрема. Еден од синовите на починатата кој сакал насилно и без почитување на протоколите да го земе телото на неговата мајка бил позитивен на коронавирус, но наместо во изолација, тој дошол пред болницата.
-На 30.06.2020 година во 19.00 часот лекари од Ковид центарот во Градската општа болница „8 Септември“ пријавиле дека од страна на неколку лица добивале сериозни закани по живот, а причина било тоа што Б.Ф. од скопско, починала во болницата, а била позитивна на Ковид-19. По излегување на местото на настанот од полициски службеници, на паркингот пред Градската општа болница „8 Септември“ биле затекнати повеќе лица, при што од полициските службеници преземени биле мерки и активности за преглед на лица и патнички возила, а меѓу нив биле затекнати Б.Ш.(32) и Б.С.(29), синови на починатата, кои сакале насилно да го земат нејзиното тело. Во Полициската станица Гази Баба бил приведен Б.С.(29), поради тоа што при проверка во евиденција за лица со решенија за изолација било констатирано дека тој не го почитувал решението за изолација и е позитивен на Ковид-19. Од страна на Единицата за внатрешни работи Аеродром и Полициската станица Драчево изготвено е решение за државен карантин, строга изолација и истиот од Полициската станица Гази Баба бил пренесен во државен карантин на сопствен трошок, а против него ќе биде поднесена кривична пријава по член 206 од Кривичниот законик, велат од МВР.
