Search

Кина забранува влез за странци за да ги намали увезените случаи на коронавирус

Кина денеска објави дека ќе забрани влез за странски државјани со валидни визи и дозволи за престој со цел да го намали бројот на увезени случаи на коронавирусот.

Забраната стапува во сила в сабота, се вели во соопштението објавено на веб-страницата на кинеското Министерство за надворешни работи.

Министерството додава дека оние со дипломатски и деловни визи нема да бидат засегнати од забраната, а странските државјани што пристигнуваат во Кина за економски, трговски, научни или технолошки активности, сепак ќе може да аплицираат за виза.

Кина не регистрира речиси ниеден локален пренос на коронавирус изминатата недела, но бројот на увезени случаи се зголемува.

Мерките се спротивни на претходната позиција на Кина во поглед на затворање на границите. Пред неколку недели Пекинг ги обвини земјите кои забранија влез за патници од Кина.

Светската здравствена организација (СЗО) советуваше да не се воведуваат ограничувања за патувања во моментот на појавата на коронавирусот.

Респираторното заболување Ковид-19 предизвикано од коронавирус од декември зеде 3.227 животи во Кина. Инфицирани се вкупно 81.285, од кои 74.051 оздравен, соопштија кинеските власти.

Во целиот свет бројот на заразени се зголеми над половина милион, а умреа повеќе од 22.000 луѓе.

Треба да знаете
Последни објави