Седум возила учествувале во вчерашната трагична сообраќајка на автопатот Велес-Скопје, меѓу кои и камион влекач кој избегал по несреќата, информираше МВР.
-На 16.01.2020 околу 08.00 часот на автопатот Велес – Скопје, после наплатна станица Отовица, се случила сообраќајна незгода помеѓу патничко возило „бмв“, со велешки регистарски ознаки, управувано од Ѓ.Ц.(29) од Велес, патничко возило „мазда“, со велешки регистарски ознаки, управувано од Р.Ј.(31) од Велес, патничко возило „шкода октавија“, со кавадаречки регистарски ознаки, управувано од С.М.(37) од Кавадарци, патничко возило „мазда“, со прилепски регистарски ознаки, управувано од Р.Д.(52) од Прилеп, патничко возило „мицубиши аутлендер“, управувано од М.К.(53) од Скопје, товарно возило „мерцедес“, со велешки регистарски ознаки, управувано од О.А.(60) од Велес и влекач, со непозната марка и регистарски ознаки, управувано од непознато лице, кое го напуштило местото на незгодата, велат од МВР.
Во незгодата со тешки телесни повреди се здобиле С.М. и сопатниците во „шкодата“, Ј.В.М.(38) и 11- годишна малолетничка, и двете од Кавадарци, додека со телесни повреди се здобиле возачите Р.Ј. и Р.Д. Повредените биле пренесени во Општата болница Велес, додека Ј.В.М. била пренесена во Комплекс клиники „Мајка Тереза“, каде починала.
Увид на местото на настанот извршиле Јавен обвинител и увидна екипа од СВР Велес.
