Извршниот директор на Светската кошаркарска федерација (ФИБА), Камил Новак, одвои дел од своето време и го посети Скопје за време на одржување на Европското првенство за кошаркарки до 16 години.
-Раководството на КФСМ – претседателот Перо Антиќ, генералниот секретар Владимир Георгиевски и спортскиот директор Тодор Гечевски заедно со Новак ги посетија спортските центри (ВИП арена при СЦБТ и големата сала при СЦЈС) каде се одигруваат натпреварите од првенството, а заедно проследија и неколку натпревари кои беа на агендата на првиот натпреварувачки ден, објавија од македонската федерацијата.
По еден ден поминат во Скопје, Новак ќе замине за Кина каде ќе се одржи Светско кошаркарско првенство од 31 август. Кошаркарската федерација на Северна Македонија ова лето организира две младински првенства, едното беше за кошаркарки до 18 години (дивизија Б) кое се одржа од 3 до 14 јули, а второто се уште е во тек.
