Зелената партија ДОМ е шокирана од, како што велат, скандалозната одлука на Уставниот суд за привремено, триесетдневно укинување на мораториумот за градење во општина Центар. Оваа одлука, според ДОМ, е крај за надежта на граѓаните дека е можно квалитетно и хумано урбано живеење.
„Општина Центар е позитивен пример за добро владеење, согласно потребите на граѓаните и почитување на јавниот пред бизнис интересот и здравјето пред профитот. Покрај воведувањето мораториум за градење, тие се и првите кои при измена на два ДУП-а го применија Законот за урбано зеленило и обезбедија најмалку 20% зеленило на градежна парцела. Ја охрабруваме општина Центар да продолжи чесно и одговорно да работи во интерес на граѓаните“, велат од ДОМ.
За ДОМ, борбата против градежната експанзија и бетонизирањето на јавниот простор е врвен приоритет. Затоа, велат од ДОМ, баравме ревизија на ДУП-овите кои не се во согласност со ГУП-от на Град Скопје и со урбанистичките и еколошките стандарди. Остануваме доследни на нашите ставови за урбано планирање кое ќе овозможи квалитетно, хумано живеење во чиста и здрава животна средина.
