Две лица починале од срцев удар додека бегале од ерупцијата на вулканот Таал, во непосредна близина на филипинската престолнина Манила, каде се дислоцирани речиси 82.000 лица, сооштија денеска локалните власти, јави ДПА.
Вулканот Таал во провинцијата Батангас, што се наоѓа на 66 километри јужно од Манила, и е на средина од езерото со исто име, во неделата почна повремено да исфрла пепел.
Жртви, според ДПА, се 65-годишна жена и 27-годишен маж од градовите Талисеј и Таал во Батангас, сооопшти регионалната канцеларија за намалување ризиците од природни катстрофи.
Жената во понеделникот доживала срцев удар, додека мажот починал вчера, додаде канцеларијата. Полицијата претходно соопшти дека возач на камион умрел во понеделникот во блиската провинција Лагуна откако ја загубил контролата врз возилото заради слабата видливост од пепелта на вулканот.
Жителите се евакуирани од градовите во Батангас и блиската провинција Кавита, но некои мажи останале да ги чуваат нивните имоти и добиток.
Тимови за итни случаи, вклучително и полиција и војници, денеска беа распоредени за да обезбедат сите да си заминат од подрачјата со висок ризик, токму поради извештаите дека некои лица ги избегнале официјалните совети и се вратиле дома откако престојувале во центрите за евакуација.
„Треба да ја спроведеме наредбата за евакуација и да ги обесхрабриме луѓето да се враќаат затоа што тоа е многу опасно”, изјави Марк Левисте, заменик-гувернер на провинциите Батангас, пренесе ДПА.
