Откако цели 15 години го глумеше Џејмс Бонд, Даниел Крег уживаше во последното мартини во чест на агентот 007 во вторникот во текот на „Тунајт шоу“ со Џими Фалон.
53-годишниот британски актер дегустира пијалок со потпис на својот лик додека ја завршува промоцијата за филмот „Не е време за умирање“ со гостување во популарното ток-шоу на „Ен-би-си“.
„Ќе ми биде чест да споделам поздрав со мартини со вас господине Бонд. Господине Крег. Ви благодарам за сè“, рече Џими (47) на крајот од нивниот разговор и извади две мартинија.
Двајцата станаа и ги чукнаа чашите додека публиката во студиото ракоплескаше. „Благодарам“, рече Даниел пред да се напие голтка.