Луѓето вклучени во најбрзиот циркус во светот и бројните љубители на „октаните“ уште ја анализираат ситуацијата од вчерашната трка во Бахреин во која се запали болидот на Роман Грожан, а францускиот „пилот“ излезе од несреќата со незначителни повреди и изгореници. Уште во првиот круг од трката, Грожан излета и удри во заштитната ограда. Од силината на ударот, болидот се подели на два дела и, што е пострашно, веднаш се запали.
Грожан остана во болидот, а веднаш пристигнаа лекарските и спасувачките екипи. На општо изненадување, Грожан успеа сам да излезе од болидот и да се оддалечи на сигурна дистанца пред пламените јазици да го изгорат целиот болид.
Грожан синоќа лично се јави од болничкиот кревет за да потврди дека е добро и дека има само мали изгореници на рацете и дланките. Многумина се прашуваат како може Грожан да има таква среќа и речиси неповреден да се спаси од таков пожар. Одговорот е во скафандерот кој го носат Ф1 возачите. Тоа е облека која е тестирана дека може да издржи на температура од неверојатни 800 степени најмалку 11 секунди. Во случајот на Грожан, скафандерот на возачот успеа да издржи и да го заштити цели 27 секунди.
