Со голема тага и болка ја примивме веста за смртта на еден од најголемите македонски интелектуалци, Љубиша Георгиевски, се наведува во телеграмата со сочувство, која ВМРО-ДПМНЕ ја испрати до семејството на режисерот и драмски писател.
Во телеграмата се наведува дека Георгиевски ќе остане запаметен како поранешен Претседател на Собранието на Република Македонија, пратеник и кандидат за Претседател на Република Македонија од редовите на ВМРО-ДПМНЕ, но пред се како голем хуманист, културен деец, врвен режисер и голем Македонец.
„Дозволете од името на целата партија и од името на сите граѓани да изразиме длабоко сочувство до семејството Георгиевски за големата загуба. Загубата на Георгиевски е загуба за целата македонска држава, интелектуална елита и културната сцена. Љубиша Георгиевски е човек кој ја задолжи Македонија со својата неуморна работа и силна посветеност во развојот на културата и остави силен печат во светската културна ризница. Неговото име ќе остане запаметено како еден од најголемите амбасадори и промотори на нашата култура, идентитет и традиција. Неговата политичка мисла и огромна љубов кон Македонија несебично ја споделуваше со светот и со тоа го заслужи местото на еден од најголемите великани на самостојна и независна Македонија за која мечтаеше, за која живееше и која несебично ја градеше“, стои во телеграмата испратена од опозициската партија.
Во неа се додадава дека Љубиша Георгиевски оставил неизбришлива трага со своето политичко и општествено делување.
„Со својот лик и дело, со својата ведрина, посветеност и оптимизам, кои заслужуваат должна почит и вечна слава, ќе остане запишан со светли букви како величина и пример за сите идни генерации на нашата Татковина“, истакнуваат од ВМРО-ДПМНЕ.
