Search

Бугарија ги затвора училиштата и рестораните до 21 декември

Бугарија објави затворање на училиштата, рестораните, трговските центри и спортските сали до 21 декември, но како и остатокот од источна Европа, и таа тешко се бори против ширењето на коронавирусот.

Според новите мерки, училиштата и универзитетите ќе се префрлат на настава преку интернет, а градинките ќе бидат затворени.

Приватните собири се ограничени на 15 лица, а сите ресторани, кафулиња и ноќни клубови ќе бидат затворени. Забранети се туристички патувања во земјата и странство.

По протестите на претприемачите, владата одлучи да дозволи работа на помали продавници, а спортските настани може да се одржат без гледачи. На театрите им е дозволено да примат само 30 проценти од нивниот капацитет.

Ограничувањата стапуваат во сила в петок за да се намали притисокот врз 7 милиони жители на државата, пренесе „Ројтерс“.

„Докажано е дека само една работа влијае на коронавирусот – намалување на социјалните контакти или карантин. Со цел да го ублажиме притисокот врз болниците што се на работ, ги воведуваме овие мерки на секои три недели“, рече премиерот Бојко Борисов.

Како и повеќето земји од централна и источна Европа, Бугарија добро се справи со пандемијата на коронавирусот пролетва, но вирусот избувна наесен. Во средата имаше 4.382 нови случаја, со што вкупниот број достигна речиси 130.000 од почетокот на пандемијата. Вкупно починаа 3.226 лица.

Треба да знаете
Последни објави