Некои приватни авиокомпании бележат зголемување на побарувачката за летови откако богатите Руси решија да патуваат на Запад поради здравствената криза, во која властите воведоа строги мерки и ги прекинаа комерцијалните летови.
Патниците одат во земји како Велика Британија и Кипар, каде што имаат свои недвижнини и право на престој, главно заради двојно државјанство или роднини кои се таму, велат извори од авиоиндустријата.
Приватните летови чинат помеѓу 16.000 и 25.000 евра, што може да ги покрие билетите на 13 патници на комерцијален лет, додаваат изворите.
„Луѓето се уморни од тоа што живеат во изолација и бараат начини да излезат“, рече Александар Озит, сопственик на брокерската компанија JETVIP, која во изминатите два месеци бележи зголемена побарувачка на приватни летови за Европа.
Приватните летови во време кога повеќето авиокомпании се затворени не е противзаконско и не е специфично само за Русите. Кинезите исто така летаат со приватни авиони од Соединетите Држави, а Американците одат во елитни домашни одморалишта.
Во март беа регистрирани 250 приватни летови на релацијата Москва-Европа, покажуваат податоците за следење на 80 авиони регистрирани во руски и европски приватни авиокомпании.
Летовите продолжија и во април, но ги имаше помалку, 61, иако Русија ги прекина редовните комерцијални летови и воведе карантин во Москва, центарот на епидемијата во таа земја.
