Search

Бесплатна филмска проекција на „Пријателка“

Во рамките на Месецот на гордоста на ЛГБТ луѓето, во градското кино „Милениум“, на 27 јуни, со почеток од 20 часот ќе се одржи проекција на играниот филм „Пријателка“ (ориг. „Rafiki“), кој ги доближува проблемите и предизвиците со кои се соочуваат геј-луѓето во општество каде истополовата љубов е забранета, а хомосексуалноста е кривично дело кое се казнува со затвор од 5 до 14 години. Во режија на Ванури Кахиу, „Пријателка“ е кениски игран филм за пријателството и деликатната љубов која се развива меѓу две млади жени, Кена и Зики, Филмот беше забранет за прикажување во сопствената земја, но ги освои срцата на луѓето ширум светот и доби бројни пофални критики.

Се вели дека „добрите кениски девојки стануваат добри кениски сопруги“, но Кена и Зики копнеат за нешто повеќе. И покрај политичкото ривалство меѓу нивните семејства, девојките истрајуваат и остануваат блиски пријателки, поддржувајќи се меѓусебно во следењето на своите соништа во едно конзервативно и религиозно општество какво што е она во Кенија. Кога љубовта процветува меѓу нив, тие ќе бидат приморани да направат избор меѓу среќата и безбедноста.

„Пријателка“ ја имаше својата интернационална премиера во програмата „Un Certain Regard“во рамките на официјалната селекција на Канскиот филмски фестивал во 2018 година; инаку тоа беше првиот кениски филм прикажан на фестивалот. Досега има освоено десеттина награди на повеќе филмски фестивали во светот.

Билетите за еднократната филмска проекција се бесплатни и може да се подигнат на билетарницата на киното. Настанот го организираат Скопје филм фестивал и Млади артивисти за промена во соработка со Здружението за културен и медиумски актвизам КВИР СКВЕР од Скопје и со финансиска поддршка од Амбасадата на Холандија.

Треба да знаете
Последни објави