Речиси сите влијателни медиуми во регионот на поранешна Југославија ја објавија веста за смртта на македонскиот великан, драмскиот писател Горан Стефановски.
„Горан Стефановски, голем македонски драмски писател, ценет и изведуван во Европа и светот, ненадејно почина. Тој требаше да биде еден од гостите на Саемот на книгата во Пула, кој почнува утре. Со Горан планиравме да ја промовираме книгата „Одисеј и други драми”, прва книга од таков вид на хрватски јазик, приредена и печатена ексклузивно за Саемот, чиј регионален партнер е Македонија. Ја подготвуваме со обострана радост и заедно со Горан едвај го чекавме моментот на средба и дружење. Ние се заблагодаруваме на неговото исклучително знаење и раскошен шарм, а тој за нашето гостопримство и подготвеност на пулски и фестивалски начин да искажеме почит кон пистаелот чија книга, конечно, премиерно ќе биде претставена на хрватската јавност. За жал, кратката и тешка болест, ни ја скуси можноста и радоста нѝ ја замени со тага поради прераното заминување на познатиот автор, чии драми, уште од крајот на 70-те години од минатиот век ја покажуваа разликата меѓу добар и исклучителен театар. Овој трагичен настан е причина повеќе во петок, во 19 часот да зборуваме за Горан Стефановски и неговата книга, онака како што заслужува тој и неговите текстови – достојни за траење”, се наведува во соопштението од пулскиот Саем на книги.
За тоа кој и каков беше Горан Стефановски и што тој значеше за македонскиот, јужнословенскиот и европскиот театар ќе зборува неговиот близок соработник, режисерот Дино Мустафиќ, актерката Мирјана Карановиќ и многу други.
Многу истакнати театарски и филмски работници од регионот на социјалните мрежи објавија последен поздрав за Стефановски.
„Хај-фај, Диво Месо, Лет во Место, Црна Дупка…многу нè инспирираше и одигра голема улога во моето форматирање на сцената. Голем дрмански пистател”, напиша на Твитер српскиот актер Сергеј Трифуновиќ.
„Нашата младост, нашиот свет на паметни, нашиот театар и њубов во него, нашето Диво месо, Тетовирани души, нашиот Одисеј, нашиот постар брат на Влатко, нашиот Соран С…замина”, се прости српскиот актер, режисер и продуцент Светозар Цветковиќ.
Филмскиот и театарски режисер Дино Мустафа од БиХ, беше еден од оние кои соработувале со Стефановски.
„Драмите на Горан се мојот балкански покрив под кој се радост и чемер, инает и нежност, лудило и страст, хумор и солзи. Ќе ми недостасуваш многу, мој драг пријателе, бидејќи многу нешта ветувавме дека ќе направиме заедно”, напиша тој.
– Горан беше последниот титан кој интелектурално дејствуваше во Македонија, иако живееше во Англија. Беше навистина важен поет и драмски писател, кој сите би требало одново да го читаме, бидејќи неговите дела, за жал, се сè поактуелни. А освен што беше интелектуалец од европско значење и еден од последните големи писатели од овие простори, беше и мој незаменлив пријател, за кого ме врзува најубавиот дел од младоста. затоа ми е тешко да зборувам за неговата смрт, изјави италијанскиот режисер Паоло Маџели.
„Каква тага, каква трагедија за театарот и театарските луѓе и публиката ширум Европа. Голем, прекрасен човек и писател, незаборавен, единствен”, напиша на Твитер хрватската режисерка Сњежана Бановиќ.
