February 3, 2023 20:29
Скопје

ЈП Комунална хигиена-Скопје врши репарација и замена на контејнерите

ЈП Комунална хигиена-Скопје започна со репарација на сите оштетени садови наменети за одлагање комунален отпад со зафатнина од 3,2 кубни метри, кои се поставени на територијата на главниот град. Воедно, екипите на Претпријатието вршат и замена на неупотребливите контејнери со нови.

– Во текот на денешниот ден почнавме со санирање на оштетувањата на пластичните контејнери со зафатнина од 3,2 кубни метри. Најчесто станува збор за репарација на рачните и ножните механизми за отворање на садовите, како и промена на оштетените капаци. Во рамките на овие активности ќе бидат опфатени сите оштетени пластични контејнери со зафатнина од 3,2 кубни метри, лоцирани на јавни површини во скопските општини Центар, Аеродром, Чаир, Кисела Вода, Карпош, Гази Баба и Ѓорче Петров, изјави в.д.директорката на ЈП Комунална хигиена-Скопје, Косана Николиќ Мазнева.

Онаму каде што постојат големи оштетувања, екипите на ЈП Комунална хигиена-Скопје ќе постават сосема нови садови, со цел максимално да се запази динамиката на одлагањето, собирањето и транспортот на комуналниот отпад во градот Скопје, информира Николиќ Мазнева.