December 5, 2022 08:53
Свет

Јапонија бара извинување од Русија: Потегот на Москва е неприфатлив

Јапонското Министерство за надворешни работи упати протестна нота до рускиот амбасадор во таа земја, Михаил Галузин. Причината е приведувањето на јапонскиот конзул во Владивосток, Мотоки Татсунора, пренесува Тасс.

Јапонскиот министер за надворешни работи Јошимаса Хајаши изјави дека Русија ја прекршила Виенската конвенција и дека потегот на Москва е „целосно неприфатлив“, пренесува јапонската новинска агенција Кјодо.

Министерот додава дека Токио бара извинување, бидејќи приведениот дипломат никогаш не бил вклучен во незаконски активности.

Сепак, според руската Федерална служба за безбедност (ФСБ), конзулот бил фатен на далечниот исток на земјата додека добивал доверливи информации за ефектите од западните санкции врз руската економија, објави „Ројтерс“.

Руското Министерство за надворешни работи соопшти дека приведениот јапонски дипломат е прогласен за „персона нон грата“ и му е наредено да ја напушти територијата на Руската Федерација во рок од 48 часа.