Младиот и успешен чешки писател Марек Шинделка доаѓа во Скопје на промоција на романот „Замор на материјалот“, објавен во издание на „Антолог“. Настанот ќе се одржи утре, со почеток во 19:30 часот, во Галеријата при МКЦ. Промотор на книгата ќе биде Алекс Букарски. Преводот на делото на македонски јазик е на Јасминка Делова-Силјанова и на Даниела Роус-Мишевска.
Марек Шинделка (1984) е чешки писател и поет. Студирал културологија на Филозофскиот факултет при Карловиот универзитет во Прага и сценаристи на прашката ФАМУ. За првата поетска збирка му е доделена наградата „Јиржи Ортен“. Двоен добитник е на наградата „Магнезија литера“.
Неговиот стил е опишан и како „способност да ги долови движењето на секој мускул, треперењето на секој нерв и влијанието на секој природен елемент: снегот, ветрот, мразот, облаците и нивните флуктуации, кои се независни од луѓето, а кои имаат безмалку егзистенцијално значење“.
Романот „Замор на материјалот“ е на многу актуелна тема – миграцијата и го опишува патот до Европа на двајца браќа од неименувана земја зафатена со војна. Нивните патишта наеднаш се разделуваат и секој продолжува на своја рака, без мапа, без врски, без контакти. Го следиме сложениот и болен пат кон север и истовремено со тоа во книгата читаме за Европа видена однадвор. Европа, која потсетува на голема машина што работи. Единственото што стои наспроти таа машина е ранливото човечко тело. Тело на искоренет човек сведен на проблем, на статистички податок, на материјал.
Книгата е фасцинантен, емпатичен гест во кој Европа се трансформира од сон за рајот во нехумано, анархично место. Гест што ни се спротивставува среде нашата удобност.
„Култивираниот јазик е во контраст со суровоста на светот во кој се одигрува приказната“, вели во рецензијата за книгата Зузана Францова.
Настанот се организира со поддршка на Амбасадата на Чешката Република во Скопје, Чешкиот центар во Софија, Чешкиот книжевен центар, Моравската библиотека во Брно и Младинскиот културен центар.
