November 26, 2022 12:31
Македонија

ЦО на СДСМ: Антикризните мерки ја спасија македонската економија, креираме нови политики за нови општествени промени

Во тешки глобални услови, со најголемите пакети антикризни мерки во регионот од 760 милиони евра Владата предводена од СДСМ успеа да ја спаси македонската економија и успеа да ја одржи и да се развива во услови на најтешка криза.

Ова е оценката на синоќешната седница на Централниот одбор на СДСМ на кој се дискутирало за актуелната состојба во земјата, економските текови, енергетската стабилност, антикризните мерки и политики на партијата за справување со последиците од глобалната економска и енергетска криза

-Во пресрет на зимата обезбедени се финансиски средства, електрична енергија и енергенси за да ја пребродиме во услови на глобална економска и енергетска криза. Нашиот енергетски систем е стабилизиран и во првата недела од декември ќе биде целосно консолидиран. Интензивно сме посветени на трансформација на енергетиката, лидери сме во регионот како земја која почна со трансформација на производство на електрична енергија од обновливи извори, се наведува во соопштението од СДСМ.

Само во изминатите 10 месеци од мандатот на Владата предводена од Димитар Ковачевски, се посочува, имаме веќе инсталирано 27 мегавати фотонапонски централи во државата, а до крајот на иднината година, 2023 година, по пат на јавно приватно партнерство ќе бидат пуштени во употреба 130 мегавати на фотоволтаични централи.

-Новите антикризни мерки веќе ги даваат резултатите, се намали цената на лебот, во наредниот период очекуваме намалување на цените на основните прехранбени производи од 10% и повеќе, стои во соопштението.

На седницата била отворена дискусија и за нови политики. Во рамки на тековната широка општествената дебата, се додава, членовите на ЦО на СДСМ разговараа, како што се посочува, за реформата на програмите за директна поддршка во земјоделството и руралниот развој, новиот модел за субвенции како и за подобрување на фискалниот и финансискиот систем, којшто ќе овозможи раст и развој во 2023 година, целосно и навремено реализирање на сите функции на државата со фокус на капиталните инвестиции и зајакнување на живониот стандард на граѓаните.

-Суштината на новиот модел за субвенции е реорганизација за поголемо производство на храна и домашно земјоделско производство, без кратење на досегашната поддршка и распределба во повеќе програми со цел поголем ефект. Моделот предност дава и поголема поддршка за вистинските земјоделци чија основна дејност е земјоделството, е правден и правичен. Даваме приоритет и поголема поддршка за она што пазарот го бара како стратешки производ и култури. Ги издвојуваме стратешките култури и производи кои влијаат во економијата на државата, за нив се зголемува финасиска поддршка со цел да овозможиме уште поголем развој и принос на стратешките важни култури и производи. Го поттикнуваме домашното производство во домашните капацитети, се посочува во однос на моделот на субвенции во земјоделството.

Опшетствената дебата за овие исклучително важни реформски процеси е додадена вредност и Централниот одбор на СДСМ, се наведува, очекува консултативниот процес да продолжи, заедно со стручата јавност, со цел заедно да креираме финален концепт за реформите во однос на новиот модел за субвенциите како и за реформите за подобрување на фискалниот и финансискиот систем.

-Внатрепартиски, оценка на ЦО е дека СДСМ е консолидирана партија, повторно на победничките патеки, којашто успешно менаџира со политичките процеси во земјава, но и со кризата во еден мошне тежок период за целиот свет. СДСМ е меѓу граѓаните, трибините „Силно и одлучно кон иднината” се масовно посетени, што значи дека политиките на партијата се препознаени и поддржани од граѓаните, наведуваат од партијата.

Присуството на СДСМ на терен со граѓаните, се додава, ќе продолжи и во иднина, заедно да зборуваме за нашата визија, за политиките за енергетската транзиција, за мерките и политиките на партијата, за новите политики за општествени промени, како и за иднината на државата како полноправна членка на ЕУ.